ДегӀа могашал эшаеннараш дӀа-хьа кхувлаш, лаьрххӀа такси хургья мехка
Тохкама болх дӀабихьачул тӀехьагӀа, дегӀа могашал эшаеннарий гӀулакхашка хьажа вахара оагӀонцара такси къоастайир мехка. Из хоам «Сердалога» бир Ӏаьдала болхлоша.
«Вахара оагӀонцара бокъонаш лораяц, аьнна, ГӀажарий-Юртара яхархо леткъачул тӀехьагӀа, Къилбаседа Кавказерча, Къулбихьерча федеральни оагӀон РФ прокуратуран керттерча моттиго тохкама болх дӀабихьар республике. Цар белгалдечох, хьалхарча группа заӀапхо хьажа вахара оагӀонцара болхло эшаш, кӀалбисача наьха маьнги, кресло-вордингаш эшаш яр. Бакъда республикерча ха яхача наха, дегӀа могашал эшаеннарашта гӀо деш йолча моттиго из гӀо даьдац», - йоах хоамо.
Иштта белгалдир, паргӀатта дӀа-хьа лела низ боацаш бола заӀапхой дарбанчешка шоаш дӀааха безаш хиннилга.
Прокуратуран болхлой оарцагӀбаьнна, заӀапхочоа маьнги, вордингаш хьаений, цунга массахана мах боацаш хьожаш саг хургволаш оттадаьд.
Цул совгӀа, прокуратурас хьалхадаьккха, 30.06.2025-ча шера денз, заӀапхой дӀа-хьа кхувлаш, «вахара оагӀонцара такси» хургья.
