ГӀалгӀай мехка наькъаш тоадеш латт, наха дезача беса
Цкъа хьалхагӀа, шоаш моллагӀа йола проект дӀайолаяле, наькъаш тоадарца ювзаенна, кхыча эшаш долча гӀулакхашца цхьана дӀалоархӀ наха бакъахьа хеташ дар а, яхаш, дийцар «Сердало» газетага республикан автодортранс Министерстве.
Масал доаладир СурхотӀе-Алхасте никъ тоабар, иштта дукха ха йоацаш кердабаьккха Шолжера Пхьилекъонгий урам.
Хьалхарча моттиге хӀанзарчоа тоабаь никъ цхьа километр мара бац. Из дехьабоалаш ба тӀадоагӀача шерга. Боахамо яхачох, деррига балхаш укхаза йистедала дезаш да 2026 шера хьалхарча ялх бетта.
ШоллагӀа масал - Шолжера Пхьилекъонгий урам ба, бӀоахал 2,3 км. Бахархошта лаьрхӀа бола никъ лоархӀаме ба: укхаза кхоъ ишкола я, иштта кхален поликлиника я. Карарча хана, цу тӀа керда никъ билла, гӀашлой наькъаш даьд, вахара лоархӀамеча моттигашта тӀабодаш бола никъ Ӏобиллаб.
«Керттера терко тӀайохийт бахархой дехарашта, уж хьакхоачаш да каьхаташца, иштта нах тӀаэцача хана тха министерстве.
Белгалдаккха деза, укх шера дукхагӀа бола болх дӀабихьар цу тайпарча наьха дехарех», - аьлар ГӀалгӀай Республикан машиний наькъий, транспорта министра Хаматхананаькъан Батыра.
Белгалду, 2025 шера республике «Вахара хьалаш тоадеш» яхача къаман проектах кхы а тоаде лерхӀаш да 42 км машина наькъаш.
