Республикера спорта ишкол цIенхашта тоаяьй
Республикера спорта ишкол тоаеш болх дIабихьар вай мехка, бекарга беттагара тушоле беттага кхаччалца. Физически культуран, спорта хьал тоадарах йолча федеральни программага гIолла из болх дIахьош баьхкараш «Оргремстрой» фирман болхлой ба, мехкарча Минстроя тIадилла. «Сердалога» из хоам бир гIишлошъяра балхех йолча министерствос.
ГIишлон тIера тхов, кораш, наIараш хийцай, пенаш шаьрдаьд, керда кIийле Iойиллай. Иштта йIовхала, хин лаьрхIа керда турбаш чуяьхкай; тока, канализаце хьал меттадоаладаьд; видеокамераш ехкай гIишлон гонахьа.
«Спорта ишкол тоаеш хинна, 36 млн совгIа рузкъа дIалаьца болх йистебаьннаб. Деррига балхаш, Даьла къахетамца, йиллача ханал хьалха чакхдаха аьттув баьлар. Эшаш мел бола кхоачам болаш ба тахан спорта ишколе», - дийцар тхога гIишлон балхех йолча министерствон хьалхалаттача Иленаькъан Мусас.
