Газа болхлоша ца доагӀаш дола декхар хьатехад СВО бӀухочун нанна
ГӀалгӀайчен МагӀалбика кхален яхархочоа, Россе Донбасс лораеш дӀахьош йолча лаьрххӀача тӀема операце бӀухочун нанна; ца доагӀаш ахча хьатехар; декхар да, аьнна, газа болхлоша. Нийсхон тӀехьа цо къахьегарах, цхьаккха пайда а хиланзар. Даьхе бахьан долаш веннача бӀухочун нанас тӀаккха кхайкарал дир ГӀалгӀайчен сага бокъонех волча викалга.
«Цо яхачох, цӀа хьалдир 2023 шера, цул тӀехьагӀа газ мел йоагаяьй лоархӏаш бола гӀирс оттабир, цига гӀолла гуш хулар йоагаяь газ мел я. Бакъда цун лицевой чота тӀа дукха ахча хьатехад, йолчул дукхагӀа квадраташ йолаш санна. Массехказа кхайкарал дарга хьежжа доацаш, из хьал меттагӏдаккха таро хиланзар. Сага бокъонех вола викал оарцагӀваьлча, моттигерча Паччахьалкхен вахара инспекце белгалдаьча «Газпром межрегионгаз Наьсаре» ООО 2025 шера саькура беттага кхаччалца ца доагӀаш хьатеха ахча Ӏодаьккхар 205 002 сом, цу цӀагӀа 2023 шера аьтинга беттага кхаччалца уж баьха цахиларах.
ТӀехьара тӀа, карарча шера тов бетта 1-ча денга кхоачаш, газа болхлоша цӀаькха оттабаь мах хьанийсбир 76 736,79 сом, дӀайодаш йола газ дагаръеча гӀирса тӀара хьатехар ларде а лоацаш. Деррига а 280 эзар сом кӏезигагӀа дала дезаш хилар яхархо», - аьлар «Сердало» газетага Гӏалгӏай Республикан УПЧ тохкама даькъ тӀа.
Цу тайпара, ГӀалгӀайчен яхархочун бокъонаш меттаоттайир, цо дукхача бетташка нийсхон тӀехьа хьийга къа а зехьа довнзар. Цу юкъе, цхьайолча хана газа болхлоша, кӀалха кӀийле йоацаш, ца доагӀаш ахчаш доахаш хилара хаттар дага ца даьллача далац вайна. Из хьалхара нийслуш а дац, ГӀалгӀайчен сага бокъо лораеча викала.
