Кхоллама балхий шоллагӀа Ишкол хьаелла кийчлуш ба вайцига
Наьсарерча гимназе, керда дешара шу долалуча хана, хьелла лерхӀ кхоллама балхех йола керда Ишкол. «Культура» яхача къаман проекта «Хьаяьй Россе» яхача федеральни проектага гӀолла дӀахьош ба из болх. Таханарча ханага хьежжа деррига тоадаь я ишкол. Дукха хӀама чулоацаш хургья цигара ялх студи.
«Дешархоша Ӏомадергда акустикаца, микрофонни техникаца, тайп-тайпарча оагӀонашкара трекаш хьакхолларца, VR/AR-оагӀонаш кийчъярца, 3D - модулированеца, тайп-тайпарча хувцамашца дувзаденнараш. Иштта царна йовзаргья геттара дика сурташ, видеороликаш яхара, монтажа программашцара, веб-дизайнацара, типографикацара, иштта кхыдолча оагӀонашцара говзал. Цига Ӏомабала йиш йолаш ба гимназера дешархой санна, иштта кхыбараш а», - язду ший Телеграмм-оагӀон тӀа вай Мехкадас Келаматанаькъан Махьмуд-Ӏаьлас.
Магасе хьайийллача иштта йолча Ишкола балхо хьагойт, из геттара пайда беш долга. Шин шера 50 совгӀа болча кагирхоша сурташ дахарца, видеоца, звукорежиссураца, электронни мукъамца ювзаенна говзал Ӏомаяьй цига.
Иштта йола моттигаш МагӀалбике, Шолжа-Шахьаре хьаелла лерхӀ. Мехка кулгалхоша из дешара программа дикка йоаржаеш, кагирхошта дуккхача хӀаман тӀехьа аьттув луш, боккха болх дӀабахьа лерхӀ республике.
Таханарча ханага хьежжа йолча тӀехдика тоаяь латтача моттиге, тайп-тайпара говзалаш шаьръеш, дукха хӀама Ӏомаде аьттув ба вай кхувш латтарий.
