Укх шерара хьувкъам чуэца техника кийчъеш я
21.06.2024 16:38
Мехка юртбоахама Министерствон ГУПашца, хӀара кӀира дӀахьош йола кхетаче дӀайихьар, цига керттера дувца оттадаь дош дар, 2024 шера ялат чуэцар, ялат чуэцара техника кийчъяр, яхаш, дийцар «Сердало» газетага ахархой боахаме.
«Цу кхетаче иштта лоархӀаме дош дар, ялат чуэцаш дола балхаш дӀадоладеш, цӀи ялара кхерамзлен Ӏалашо е езилга.
ГУПий кулгалхоша белгалдир, хӀанз боахамашка ялат чуэца техника кийчъярца цхьана, керда ялат дӀаде токаш, складаш кийчъеш хилар. Уж цӀенъю, эша молхаш а тох», - йоах хоамо.
Цул совгӀа, цига дийцар, «Россельхозцентр» ФГБУ моттигерча филиала говзанчаша, ялат фуна мегаш дий хьожаш, болх дӀабахьа безарах.
Иштта юртбоахама культурашца дувзаденна кхыдола дешаш а дийцар.
