Айфон йохкаргья аьнна зуламхо, лохаш ва ГӀалгӀайче
ГӀалгӀай Республикан Наьсарен кхален полице лохаш ва, кхыча моттиге вахаш вола тийшаболх лелабу саг. 48 эзар сом лочкъадаьд цо онлайн-мах беш, телефон йохка воалл ше, аьнна, - йоах «Сердало» газетага республикан МВД.
«Бокъонаш лораераш болча вера моттигера вахархо, малав ца ховча сага, Интернета бувзамашка гӀолла йохка оттаяь «Айфон 15 про макс» яха мобильни телефон йохкаш санна, 48 эзар сом шийна дӀатӀатассийтад, цул тӀехьагӀа из, мичав ца ховш, вайна дӀаваьннав», - йоах бокъонаш лораеча боахаме.
АргӀанарча зуламхочо ше лаьрхӀа хинна тийшаболх чакхбаьккхар. ГӀалгӀай Республикан МВД цӀаькха а хьалхадоаккх вай бахархошта, Интернете гӀолла шоаш нахага Ӏеха ма дайта, малаш ба ца ховча нахах ма теша.
Нагахьа санна цу тайпара шоаш Ӏехадаь моттиг нийслой, сиха полице хоам бе, нийсденнар ма дарра дӀадувца. Цо тешал ду, дукха ха ялалехь из зуламхо хьалохаргхилара, законо дӀадеххача тайпара из бехктокхаме озаргхилара.
