ГӏалгӀай мехка цӏенхаштта тоаергья ялх дешара моттиг
Карарча шера ГӏалгӀайче дӀахо тоаергья дешара моттигаш. Мехка гӀишлошъяра Министерствон дехарах цу тайпара ялх моттиг тоаергья. Царна юкъейоагӀа «Золушка» яха берий беш (ЖӀайрахь), «Селаӏад» яха берий беш (Гӏажарий-Юрт), «Бӏы» яха берий беш (МагӀалбик-Шахьар), «Фаьлг» яха Ӏарпенаькъан М.А. цӀерагӀа берий беш (Магас), ГӏалгӀай политехнически Ӏарпенаькъан Ю.И. цӀерагӀа колледж (Наьсарен-Шахьар), иштта №1 йола Чехкенаькъан С.И. цӀерагӀа гимнази (МагӀалбик).
«Бекарга бетта 1-ча денга кхачалехь, паччахьалкхен тӀаьргаш дӀахьоргья, цул тӀехьагӀа къахьегама тоабаша балхаш дӀадоладергда», - аьлар «Сердало» газетага ГӏалгӀайчен гӀишлошъяра Министерстве.
Уж гӏишлош кердаяха лаьрхӀар мехка гӀишлошъяра Министерствон кхело, кхоачамбоацараш гучадоахаш оттадаьча каьхатех. Кхела чубоагӀаш бар цу дешара моттигий викалаш, цо таро лу гӀишлон ма барра мах оттабе. Бувцаш бола болх бергба «Кагирхой, бераш», «Дезал» яхача программашта чубоагӀаш.
Республикан дешара оагӀув дегӀайоалаяра новкъостал лоаттаду даим.
Белгалду, 2022 шера денз 2025 шерга кхаччалца «Дешар дегӀадоаладар» яхача программанна чуйоагӀаш ГӏалгӀайче 41 дешара моттиг тоаяь хилар. Иштта дале а, тоае езаш кхы а дукха моттигаш я дешара даькъ тӀа – ткъаь итт совгӀа дешара моттиг я тоае езаш. Карара шу лоархӀаме хургда из декхар кхоачашдеча, цо таро лургья республикан берашта, кагирхошта кхерамзлен дика дешара хьалаш хьакхолла.
