Нувхаш Ӏокхувсаш дола гӀулакх, массайола оагӀув чулоацаш, къоастадергда
Ӏалама гӀулакхех йолча министерствос белгалду; даггара духьале лоаттаешшехь, кхаьч-кхаьчача нувхаш Ӏокхувсаш дола гӀулакх дӀадоалаш дац, яхаш. Таханарча дийнахьа, хӀама бе доацачар Ӏалама зе деш, нувхаш йоаржаяь моттигаш 60 я.
«Сердалога» из хоам бу министерствос. Цу ерригача моттигашта тӀахьожам беш ба тахан. Прокуратураца дийцад, Ӏалама зе деш бараш бехктокхаме оза, хӀаьта моттигашкарча администрацешта тӀадиллад нувхий гувнаш Ӏалаьмате чехка дӀадаха, аьнна.
«Нувхий гувнаш латта 13 йоккха моттиг «Боккха лостам» яхача федеральни проектага гӀолла цӀенъергья Росприроднадзори Роспотребнадзори юкъе йолаш», - йоах тхога кхаьчача хоамо. Вай мехка, цу оагӀонцара хьал тоаде гӀерташ, къахьег тахан. Укх шера йоккхача нувхашта лаьрхӀа 414 контейнер хьачуений мехка.
Шахьарашкарча, юрташкарча моттигашка гӀолла дӀа-хьа йийкъай уж. Ахкан хана цу оагӀонца кхоачашде дезарашта а соцам баьб, 10 керда, контейнерашта лаьрхӀа доазош къоастаде дезаш ба администрацешкара кулгалхой. ХӀаьта цу оагӀонца эггара керттердар - бахархой Ӏалама моттигаш лораеш, нувхаш йоаржаяр мел ийрча, во, сага юхь йоаеш болх болга кхетадеш хилар да.
