Автомобиль дӀаяьккхар, малара тӀера волча водителгара
Корта бохабу малар менна волча мехка столицан вахархочунгара, ГӏалгӀай Республикан Магаса кхален суда соцамах, паччахьалкхенна болча пайданна дӀачугӀоргйолаш, автомобиль дӀаяьккхар, яхаш, дийцар «Сердало» газетага республикан Прокуратуре.
«Уголовни гӀулакх техкад 26 шу даьннача моттигерча вахархочун Шоанахой Н. духьала. Из бехке ву РФ УК 1 д. 264.1 ст. ( корта бохабу малар менна а волаш, автомобиль лелаеш хиларах, хьалхагӀа а из бахьан долаш лаьца хиннав из)»,-аьлар бокъонаш лораераша.
Хоам бу, карарча шера Ӏай, Магасе из саг, корта бохабу малар менна а волаш, машинаца воагӀаш соцаваь хиларах. Из доацаш а, хьалхагӀа цу тайпара цо законаш телхадеш хиларах из бехктокхаме эзав.
Наькъа полице болхлоша из Ӏоваьккхар машина тӀара, деррига гӀулакх дӀа а лаьрхӀа, ший соцам бир Ӏаьдало.
Бокъо телхаяьчоа 300 сахьата Ӏаьдала болх бе безаш бехк бир, цул совгӀа 2 шера машин лелае бокъо а луц цунна, иштта паччахьалкхенна болча пайданна дӀаеннай цун хинна автомобиль.
