Россе спорта говзанчанна майдилг елар
Физически культуран, спорта оагӀув хьаллоацаш хьинаре къахьегарах, спорта гӀулакхех йолча республикерча Министерствон майдилг луш, баркал аьлар Россе спорта говзанча волча Манкенаькъан Бек-хана. РФ спорта Министерствон 100 шу дизарца дувзаденна дар из беркате гӀулакх. Из хоам «Сердало» газетага бир спорта латарах йолча федераце.
«Лакха говзал йолча тренера майдилг еннар спорта гӀулакхех йолча Министерствон кулгал деш вола Белхарой Руслан вар. Спорта наькъ тӀа хьинаре къахьегаш, доккхий толамаш доахаш, хьавенача Бек-хана баркал аьлар цо; аьттонца, иразе ваха даькъалавийцар»,- йоах тхогарча хоамо.
Спорта вахаре дикка къахьегаш хьавенав Манкенаькъан Бек-хан. Россе спорта говзанч, ГӀалгӀай республикерча физически культуран цӀихеза болхло яха цӀераш еннай цунна. Таханарча дийнахьа тренер волаш, республикерча спорта латарах йолча федераце вице-президент волаш, къахьегаш ва из.
