Шин бера нанна алиментех дола декхар хьаделар
Гӏалгӏайчен сага бокъонех волча викала балха фусаме республикан яхархо ера, шийна хьалхашка нийсденна бокъонаш телхаеш дола хаттараш къоастаде. Бокъонаш кхоачашъеш долча ӏаьдало дӏахьоча балха раьза йоацаш яр из. Цо яхачох, хьалхагӏа судо декхар оттадир, зӏамигача шин бера доагӏаш дола алименташ хьадала. Бакъда дӏахо из гӏулакх соцадир. Цу кхалсага яхачох, из бокъо йоацаш юхасоцадаьд.
«Декхар кхоачашдара бехктокхаме оттавеш йола каьхата оагӏув йоаяьй, гӏулакх дӏакъайлад, са берашта доагӏаш дола алименташ массехк шера хьалуш дац», - аьлар кхалсага Гӏалгӏай Республикан УПЧ ше латкъаш.
Цу гӏулакха лерхӏам боккха хиларга хьежжа, сага бокъонаш лораяра волча викала Ростовски областе гӏолла йолча Россе суда пирстопий Федеральни гӏулакха Керттерча урхаллене лаьрххӏа дола каьхат дӏадахьийтар. Цу тӏа хьадехар суда пирстопий болх ма барра тахкар, кхалсага бокъонаш меттаоттаяр.
Из хаттар тохкаш, Ростовски областе гӏолла йолча Россе ФССП ГУ боахаме тӏахьожама болх дӏабихьар, цига гучадаьлар ӏаьдала болхлоша кхоачамбоацараш балха юкъедалийта хилар.
«Сердало» газетага баьча хоамах, Гӏалгӏай Республикан УПЧ хоамий-аналитически даькъ тӏа соцам бир, из гӏулакх юха кердадаккха. Цу тайпара суда пирстопашка-кхоачашдечарга дехар дӏадахьийтар йоагӏаш йолча кредита моттигашка, декхарийла волча сага таронга хьажа, цунгара низагӏа хьаӏайна латта алименташ хьадаха, аьнна.
