Мехкдаьтта лочкъаде гӀийртачунна суд йир
24.07.2024 12:22
Мехкдаьтта чулаттача турба чура, из мехка рузкъа лочкъаде гӀийртачунна суд йир вай мехка. МагӀалбике нийсденнад из ийрча гӀулакх. «Сердалога» из хоам бир Ӏаьдала болхлоша.
«Судо, тохкама болхлоша белгалдечох, дӀадахача шера гурахьа МагӀалбика кхаленна чуйоагӀача Аьккхий-Юрта гӀолла йодача турба чура мехкдаьтта лочкъаде лаьрхӀа, хӀама дӀатӀахеттай цо. Ӏаьдала бокъонна духьала долча цу гӀулакхаца, турба толхаяьй цу сага», - йоах тхога кхаьчача хоамо.
Деррига техкача, судо, кортмукъа такха езаш, кхо шу суд йир зуламхочоа.
