Ха яхача наха, могашал эшаеннарашта гӀо деш йола моттиг йиллача ханал бутт хьалха хьаелларгья
Ха яхача наха, дегӀа могашал эшаеннарашта гӀо деш хургйола МагӀалбикера моттиг, йиллача ханал бутт хьалха хьаелларгья. «Демографи» яхача къаман проектага гӀолла дӀахьош ба из беркате болх.
«ТӀеххьара балхаш чакхдоахаш боахк укхаза болхлой тахан. ДоккхагӀа дола декхараш кхоачашдаь даьннад, ков баьццардерзадеш къахьегаш ба уж. Йиллача ханал бутт хьалха йистеяргья гӀишло. ГӀишлонхоша шоай болх бехктокхаме дӀабихьалга да из», - дийцар «Сердалога» республикан паччахьалкхен викалаша.
ДегӀа могашал эшаеннача, ха яхача наха тайп-тайпара новкъостал лоаттадеш, дарба деш хургья из беркате моттиг.
Мехкарча кулгалхоша шоашта хьалхашка оттадаь лоархӀаме декхар да, унахцӀено эшаеннача, ха яхача наьха хьашташ кхоачашдеш, царна паргӀатта ха яккха, дарба де моттиг хилийтар.
