«Иразá можолг ле» яха болам ба мехка дIахьош
Дикка баржаш латт вай мехка «Иразá моажолг ле» яха ерригача Россе болам. «Даьхен Лорбой» яхача ганза филиала вай мехкарча болхлоша, тIема операцен доакъашхошца цхьана, даькъалабийцар мехкахой безама, дезала Денца. Из хоам «Сердалога» бир цу гIулакха хьалхалаттараша.
«ЦIай дIадихьар Магасе. ТIема операцен доакъашхоша, вахара хьашташ кхоачашдераша иразе, могаш, беркатаца баха даькъала бувцаш, моажолгаш дийкъар бахархошта. Къаьстта терко е хьежар вай боккхийбарашта. Дезала юкъе барт, безам, цхьоагIо хургдолаш лораде дезараш хьалхадоахаш, шоай вахарера масалаш кхийлар цар», - дийцар тхога.
«Дезал - эггара хьамсарагIа, бочагIа бола оагIув ба хIара сага вахаре. Могаш, маьрша болаш; дикача хIаман тIехьа аьттув болаш, бахалба вай мехкахой», - аьлар филиала кулгал деча Оздой Муслима.
