ГӀалгӀай мехка болх бе йолаеннай геракаш айярах йола спорта Федераци
ГӀалгӀай Республике болх бе йолаелар геракаш айярах йолча спорта Федераци. Кердача спортивни фусама президент ва кулгаш гӀортадарах Россе ялхазза чемпион Тиймарзанаькъан ИбрахӀим, яхаш, дийцар «Сердало» газетага мехка спорта Министерстве.
Цох дувцаш, физически культуран, спорта министра Белхарой Руслана белгалдир, Федераци хьаелларо таро лу къаьстта цу даькъ тӀара спорт лелаеш барашта шоай говзала боарам лакхбе, иштта спортсмена лакхагӀча лагӀа тӀа отта.
Мехка спорта министраца къамаьл деш, Тиймарзанаькъан ИбрахӀима аьлар кастлуш де лерхӀачох ший балха даькъ тӀа. Цо яхачох, моттигера федераци хьаелларо таро лу вай мехкахошта эггара лакхагӀча халкъашта юкъерча моттиге шоаш дӀагойта.
«Со тешаш ва, ИбрахӀима дукха пайда бахьаргба вай республикан спорт дегӀайоалаеча. ХӀаьта спорта Министерствос ший оагӀорахьа массе тайпара новкъостал дергда из хьаллацара», - аьлар боахама кулгалхочо.
Белгалду, керда кулгалхо ше ва халкъашта юкъерча класса мастер; Европа, дунен чемпион, иштта ГӀалгӀай Республикан кулгаш гӀортадарах йолча Федераце вице-президент.
