«Даьхен байракх - сийлен дезадар» яха гойтам хьабийллар мехка
ХӀара шера укх маьцхали беттарча 22-ча дийнахьа дездеш да РФ паччахьалкхен байракха Ди. Цу денна хетабаь «Даьхен байракх - сийлен дезадар» яха гойтам хьабийллар мехкахбаьхача наьха Мемориальни комплексе. Тайп-тайпарча ханашкара Россе истори довзийташ ба из.
«Гойтама керттера декхар да, паччахьалкхен байракхашка гӀолла тайп-тайпарча ханашкарча ноахалашта юкъера бувзам гойтар. Российски импери, СССР, таханарча Россе ханашкара байракха куцаш довзаргда цига гулбеннарашта. Россе дахача къамаша, бӀаьшерашкара денз, хьадахьача Ӏадаташца дувзаденна да байракхий доккха истори», - дийцар «Сердалога» из гойтам дӀахьош хиннараша.
Россе Паччахьалкхен байракха Ди 1994-ча шерарча маьцхали бетта 20-ча дийнахьа №1724 йолча Россе Президента соцамца чӀоагӀдаь да. 1991-ча шерарча маьцхали бетта 20-ча дийнахьа кхаь бесах йола исторически байракх юха меттаоттаярца баь соцам бар из.
Укх беттарча 25-ча денга кхаччалца бийлла хургба гойтам; моллагӀа Россе байракха истори довза ловш вола саг ва цига дакъа лаца йиш йолаш.
