ГӀалгӀайче «Вай дахаш да Россе» яхача яхье котбаьннарашта совгӀаташ делар
ГӀалгӀай паччахьалкхен университета хоамий-тароний центре дӀайихьар «Эрсий мотт- къамашта юкъера бувзам» яха литературни сайре. Цига «Вай дахаш да Россе» яхача яхьа чаккхе йир. Кхетаче дӀахьош яр, ГӀалгӀайчен Миннаца викалаш юкъе а болаш, иштта цига дакъа лоацаш хилар мехка къаман-культуран юкъарлонаш, йоазонхой, юкъара палата, тайп-тайпарча организацей викалаш.
Дукхача къамех латтача Россе паччахьалкхен эрсий меттах дийцар кхетачене, цун ГӀалгӀайче дахаш долча къамий лерхӀамах. Республикан цӀихезача поэташа Чаненаькъан Тамарас, Эсамарзанаькъан Ӏалаудина, БӀарахой Мадинас, Дударанаькъан Маккас хьаьшашта довзийтар шоай кхолламаш. «Вай дахаш да Россе» яхача яхье, Россе эрсий меттах, исторех, культурах лаьттача даькъ тӀа котбаьннарашта совгӀаташ а делар»,-аьлар «Сердало» газетага ГӀалгӀайчен Миннаце.
«Вай дахаш да Россе» яха яхь дӀахьош яр кхыча паччахьалкхен дезалашкарча берашца. Доакъашхоша гойтар, шоаш бахача мехка эрсий мотт ховш хилар, истори, культура йовзаш хилар.
Яхьа кхелахоша массехк даькъа бийкъа хиннача балха мах бир; Россе культура, истори довзар, эрсий мотт хар миштад хьожаш. Котбаьннарашта мах бола совгӀаташ делар, цар дӀахойодача хана эрсий мотт дикагӀа Ӏомабергболаш, культура йовзаш уж хургболаш.
