Алмазов В.А. цӀерах йолча НМИЦ болхлой кхаьчаб вай мехка
Дега лазараш долча наха дарба дар малагӀча боарам тӀа латт тохкаш, хургба вай мехка кхаьча Къаман унахцӀенон тохкама оагӀон болхлой. Дегаца лазараш долча бахархой хьал мишта латт хьожаш хургба шоай болх кӀоарга бовзаш бола говзанчаш.
«Кардиологически, реанимационни моттигашкара болх, дарбанчешка бадача унахой хьал тохкаш, иштта моттигерча поликлиникашкарча, амбулаторешкарча унахой карташка хьожаргба уж. Къаьстта терко ергья кардиологий балха, унахошта тӀахьожам лоаттабеш дола гӀулакх, мах боацаш царна йоагӀаш йола молхаш дӀателар мишта латт хьожаш», - дийцар «Сердалога» цу оагӀонцарча министерстве.
Алмазов В. А. цӀерах йола Къаман унахцӀенон тохкама моттиг Россе лакха лоархӀаш я тахан; цудухьа, цу оагӀонцарча болхлой говзалга гӀолла, вай мехкара хьал тоадала мег.
Царца бувзам лоаттабеча вай лорий шоай кхетам лакхбе, дукха хӀама Ӏомаде аьттув ба. ДӀахойодача хана а, мехка цӀихеза болча кардиологашца семинараш еш, цу оагӀонцара болх тоабе лерхӀ вайцига.
Иштта лакха говзал йолча лорашца дагабаларо унахочун де деза дарба къоастадеш гӀо дергда вай унахцӀенон оагӀонцарча лорашта. Кардиологически оагӀонцара болх боаггӀача боараме дӀаоттабеш хургда из гӀулакх.
