ДикагӀа болча хьехархой-психологий цӀераш яьхар мехка
«Хьехархо-психолог-2024» яхача ерригача Россе дӀахьош йолча вайцигарча яхьашка котбаьннарий цӀераш яьхар мехка.Котало яьккхараш ба МагӀалбикерча № 2 йолча ишкола хьехархо Балайнаькъан Аза, Буро кӀалхарча Заьзганаькъан И. цӀерах йолча ишкола хьехархо Налганаькъан Аьсет, Наьсарерча № 8 йолча ишколера ГӀамарзанаькъан Диана.
«Ювцача «Хьехархо-психолог» яхача яхьаша хьехархой балхацара начӀал гучадоаккх, цул совгӀа, шоай говзал лакхъе аьттув лу.
Дешара моттигашка психологически оагӀонцара новкъостал лоархӀаме долга хьагойт яхьаша», - дийцар «Сердало» газетага дешараеи Ӏилмани гӀулакхех йолча министерстве.
Республикерча тайп-тайпарча ишколашкара 20 совгӀа хьехархо вар дакъа лоацаш хиннар. Берашца, кагирхошца шоаш дӀакхухьача балхах, юкъедоаладаьча кердадарех дийцар цар. Яхьаш йистейоалаш, цу оагӀонца шоаш дӀакхухьаш бола болх гойтар пхе доакъашхочо. Массанешка хьежа, толашагӀбараш хьакъоастабир кхелахоша.
