Гӏалгӏайче белгалйир ишколай дикагӏа йола столовеш
Гӏалгӏайчен ишколашка кийчбеча кхачан даькъца ювзаенна, лоархӏаме кхетаче хилар. Тӏой-Юртарча №4 йолча ишколе дӏайихьар «Дикагӏа йола столови-2025» яха республикански яхь. Цу кхетаче гулбелар республикан ишколай столовешка болх берех дикагӏа бола викалаш, шоай балха говзал гойта кийчабараш. Царна юкъера хержар пхиъ дикагӏвар. Котбаьннарий ишколаша гойтар берашта кхача кийчбара лакха дикал йола моттигаш».
Из кхетаче дӏахьош боккъонца дола цӏай хилар: ишкола дешархоша кийчъяьяр концертий программаш, ашараш. Цул тӏехьагӏа кхелахой ший болх дӏабахьа болабелар. Хӏара тоабо гойтар ший дика даараш, цу юкъе санитарни боарам лорабеш, тайп-тайпара даараш долаш, дикал йола кхача юкъебоахаш, гойташ дола даараш чам болаш хилийтара къахьийгар цар.
Яхь чакхйоалаш хьалхара моттиг елар Инаркъерча №11 йолча ишкола, шоллагӏа моттиг яьккхар Наьсарен №3 йолча юкъерча ишколо, хӏаьта кхоалагӏа моттиг йийкъар ӏалий-Юртарча №1 йолча лицейнеи Шолжерча №2 йолча юкъерча ишколаи, иштта Илдарха-Гӏалан №1 йолча юкъерча ишколаи юкъе»,-аьлар «Сердало» газетага Гӏалгӏайчен дешара, ӏилман Министерстве.
Белгалду, жюре мах оттабир даарий чама меттел, уж вӏашагӏтохара а, даараш кийчдечар балха говзала, къаьстта унахцӏенонна накъадоалаш даараш кийчдара. Республикан дикагӏа йолча ишколашта доагӏаш дола совгӏаташ делар. Хӏанз цар таро я шоашта ховш дар новкъосташца декъа, цо мехка дешара юкъарча кхачан таронаш кхы а дикагӏа тоаергья.
