ГӀалгӀайче хьакхайкабир, «Земски хьехархо» яхача программе дакъа лаьцараш
ГӀалгӀай мехка белгалбаьхар, «Земски хьехархо» яхача программан юкъе котбаьннараш. Юрташка болх бе раьза хиннача ялх хьехархочунна, цкъара луш дола ахча хьаэца бокъо елар.
«Мехка хьехархочун йиъ яьсса моттиг яр Юкъерча Ачалкхерча №15 йолча юкъерча ишколе, Заьзгакъонгий-Юртарча №26 йолча юкъерча ишколе, Вежарий-Юртарча №10 йолча ишколе, Эккажкъонгий-Юртарча №4 йолча ишколе, кхо моттиг ингалсий мотт хьехара яр Южнерча №28 йолча юкъерча ишколе, Вежарий-Юрта №10 йолча юкъерча ишколе, Долакха-Юртарча №3 йолча юкъерча ишколе, иштта эрсий меттеи литературани цхьа моттиг яр Эбарга-Юртарча №5 йолча юкъерча ишколе. Верригаш яхье дакъа лоацаш вар 13 саг. Котбаьннарашца карарча хана каьхаташ оттадеш да.
Хьехархой шин моттигаца ювзаенна: Заьзгакъонгий-Юрта №26 йолча юкъерча ишколе, Эккажкъонгий-Юртарча №4 йолча юкъерча ишколе – математика харжара цхьаькха яхь кхайкаяьй»,-аьлар «Сердало» газетага ГӀалгӀайчен дешара, Ӏилман Министерстве.
«Земски хьехархо» яха программа лаьрхӀа я; юрташка, Россе йоккха йоацача шахьарашка болх беш бола хьехархой хьаллацара, из мехка дешара Министерствос дехарах юкъеяьккхай.
Цун маӀан - дешара даькъ тӀа лакха балха говзал йола хьехархой хилийтар, гаьнарча мехкашкара дешара хьал тоадар.
