Балха говзал Ӏомаеча юкъерча дешарах дийцар республике
Россе дешара Министерствон юкъерча дешара хьалах болча оагӀонцарча паччахьалкхен политика Департамента кулгалдеча Неумывакин Викторца кхетаче дӀайихьар дешареи Ӏилмани гӀулакхех йолча Министерствонна хьалхалаттача Цхьорой Ахьмад-Башира. ВӀашагӀкхетаре дийцар балха говзал Ӏомаеча юкъерча дешара оагӀув республике боаржабарах.
«Къаьстта йоккха терко тӀайохийташ дийцар, мехка тахан эшаш бола говзанчаш кийчбеш йола «Балхалитет», «Балха отта гӀо дар» яха проекташ йоаржаярах», - дийцар «Сердалога» вай министерстве. Иштта кхетаче дийцар, юкъерча дешара хьал тахан мехка малагӀча боараме латт, дийша баьнна арабаьннача кагирхошта болх бе моттигаш хилийтарах, дешара гӀулакх ма хулла тоадарах.
Белгалде деза, юкъера дешар вай мехкарча кагирхошта юкъе дикка даьржа долга. Дешара никъ дӀахохьош, дукхагӀбараша колледжаш хорж.
