Шолжа бердаш цӀендеш, экоболам хургба
ГӏалгӀайчен Ӏалама Министерстве кхетаче хилар Мизенаькъан Микаила «Экосистема» яхача Ерригроссийски экологически болама моттигерча даькъа кулгалхочунца, иштта кагирхой политикан, туризма Министерствон викалашца, цига дийцар экологически болама чудоагӀаш цхьана болх дӀабахьарах, яхаш, дийцар «Сердало» газетага республикан Ӏалама Министерствос.
«Кхетаче дӀахьош, «Тхо цӀенонна тӀехьа да» яха Ерригроссийски болама чудоагӀаш къахьегама шоатта ди дӀадахьа. Доакъашхоша лаьрхӀад Шолжа хий нувхех цӀенде», - аьлар хоамо.
Министра аьлар, шоатта ди дӀахьош дакъа лацара ше кийча ва, эшача гӀирсаца новкъостал де. ГӏалгӀайчен Ӏалама Министерствос хьалххе а хоам бергба, ший лаьрххӀача гӀирсашка гӀолла, шоатта ди дӀахьош хиларах.
Бекарга бетта 18-ча дийнахьа денз 27-ча денга кхаччалца паркаш, хиний йистош, кхыйола Ӏалама моттигаш цӀенъергья, Коталон ди тӀакхоачаш. Цу тайпара кхетаченаш дӀаяхьар дика пайда луш да, хьамсарча мехка Ӏалам лорадеча.
