Гуржий мехкаца бувзам лоаттабарах дийцар республике
Россе-Гуржий гӀулакхех болча агӀон хьалха латтача Балашов Юреца кхетаче дӀайихьар Мехкадас Келаматанаькъан Махьмуд-Ӏаьлас вай мехка. Республикан, Гуржий мехка юкъера хӀама йохкара-экономикацарча бувзамах дийцар цига.
«БӀаьшерашка денз вӀаший барт лорабеш, бувзам болаш, хьадаьхкад вай къамаш. Истореца чӀоагӀбенна латтача цу бувзамо вӀаший гӀулакхаш леладе бух кхолл», - аьлар вай Мехкадас, из мел лоархӀаме да белгалдеш.
Цу оагӀонца керттера моттиг дӀалоацаш хургья ГӀалгӀайче дӀаяхьа лерхӀа къамашта юкъера кагирхой кхетаче. Вай Мехкадас белгалдир, шинна оагӀорахьарча кагирхошта юкъера бувзам чӀоагӀбара аьттув болаш моттиг вай республика йолга.
Кхетачен программа, цунна лаьрхӀа йола ха къоастаеш болх дӀаболабергба тоабо, йоккха юкъ ялалехь. Керттердарех даь дувцаргда культураца, дешара оагӀонца, бизнесаца дувзаденнараш.
