Укх бетта дӀаяхьа езача Парламента йоккхача кхетаченах дийцар вай мехка
Укх бетта хургйолча йоккхача кхетаченна юкъейолхаш йола законопроекташ йийцар хӀара кӀира Парламента спикер волча ТӀумхой Мухьмада кулгал деш дӀакхухьача кхетаченашка. Из хоам «Сердалога» бир цу моттигера.
«Уж ювцача дакъа лоацаш бар администраце, фракцей, комитетий доакъашхой. Дувца оттадаьрашта юкъе дар лаьттанца, паччахьалкхен доалахьарча хӀаман доал дарца, промышленни политикаца, вӀаштӀара даь цӀенош тоадарца, заӀапхошта болх бе моттигаш Ӏалашъярца дувзаденна дешаш», - йоах хоамо.
Иштта унахцӀенон гӀулакхех, вахара политиках йолча комитета хьалха латтача Гарчхананаькъан Беслана белгалдир, 2000-ча шера саькура бетта 29-ча дийнахьа № 2–РЗ йолча Халкъа Гуллама соцама проекта керттера моттигаш яшхар, цо дийцар цу закона 10-ча оагӀон проекта статьях лаьца.
Вешта аьлча, цу закона белгалйоах «ГӀалгӀай Республике паччахьалкхен моттигашка къахьегаш болчарна когаметта болх баьрашта вахара оагӀоно луча бокъонашца дувзаденнараш».
ХӀара комитете дӀахо дӀахьоргба из болх.
