Тохкама оагӀони ЦУРаи юкъерча бувзамах дийцар мехка
Мехка доал дарах болча оагӀон кулгалхочунца кхетаче дӀайихьар мехкарча тохкама моттига кулгалхочо. Из хоам «Сердалога» бир мехкарча СУ СК.
«Россе тохкама моттига республикерча СК кулгал деча Асхабов Мухьмада Ахьмада, мехка доал дарах болча оагӀон хьалха латтача Банхай Берса Беслана дӀадихьача вӀашагӀкхетаре дийцар цу шин моттига юкъерча бувзамех»,- йоах тхога бенача хоамо.
Цхьана болх дӀабахьарца, бахархошка моллагӀа хоам ханнахьа дӀакхача безарца дувзаденнараш белгалдир хьакимаша. Шинна моттигá хьалха латтача керттерча декхарех дийцар кхетаче, къаьстта терко йир ЖКХ оагӀонца дувзаденнарашта. Мехкара хьал лорадара, бахархой хьал тоадара тӀехьа кхоачашде дезараш белгалдир цига.
«Шинна хьакима къамаьлах гуш дар, иштта йола кхетаченаш дӀакхахьар чӀоагӀа лоархӀаме долга. Мехкарча бахархой кхерамзлен хьал лорадара тӀехьа цӀенхаштта болх бе лаьрхӀа ба хьакимаш», - йоах тхогарча хоамо.
