«Шера дикагӀа вола дешархо» яха Х-гӀа преми еннараш хьакхайкабир
ГӀалгӀайче чаккхе йир «Шера дикагӀа вола дешархо» яха, хӀара шера луш йола Х-гӀа преми дӀалуш. Цига дакъа лоацаш бар Наьсарен кхален 20 ишколера дешархой, яхаш, дийцар «Сердало» газетага из болх вӀашагӀбеллача Хучбаранаькъан Адама.
«Сурхо тӀа бахача Хучбаранаькъан вежараша оттадаь совгӀаташ дар уж, берий дешарцара безам совбаккха лаьрхӀа. СовгӀаташ, грамоташ елар 7-11-ча классашка вагӀача 16 дешархочоа, уж бар Сурхо тӀарча, Ӏаьлий-Юртарча, Эккажкъонгий-Юртарча, Яндарерча ишколай дешархой», - аьлар тха газетага.
Цул совгӀа, берий даьшта а иштта хьехархошта а шоай балха даькъ тӀара совгӀаташ делар. Цу яхьан юкъе «Юртара дикагӀа йола ишкол» яха керда оагӀув юкъеяьккхар.
Тхоца къамаьл даьчо яхачох, бераш иштта хьаллоацаш хиларо, цар дешарцара безам а совбоаккх.
