ГӀалгӀай мехко доаккхал ду, А.В.Щусева цӀерагӀча архитектуран музейца бувзам хиларах
ГӀалгӀайчен гӀалаш тахкарах йола программа кхоачашъе дагахьа, «АСМ Группа» говзанчаша тахан Москверча А.В. Щусева цӀерагӀча архитектуран музейца лаьрххӀа бола болх дӀахьу, яхаш, дийцар «Сердало» газетага мехка министрий кабинето.
«Из бувзам хилар бахьан долаш, корадаьд тамашийна архивашкара сурташ, цар хьаелл дӀадахача бӀаьшерен гӀалгӀай гӀалай исторе керда оагӀонаш.
Цхьа бӀаь шу хьалха, Л.П. Семеновс экспедици еча хана, даьха сурташ вай къаман культуран тӀехьаленна боккха мах болаш да», - йоах хоамо. Царна юкъе я гӀалаш ягӀа моттиг ВӀовнушки (1926 шу), иштта Мецхал яха юрт (1927 шу). Ӏилманхоша яхачох, цу тохкамо новкъостал ду, ший тайпарча ГӀалгӀайчен тӀехьален хозал кӀоаргагӀа йовза.
Къаьнарча сурташа дувц, дӀаяхача замах архитектуран гӀишлош хьалъяра леладеш хиннарех, из чӀоагӀа лоархӀаме да дӀадахачунца ювзаенна моттигаш тоаеча.
