«Даьре никъ» яха парк тоаеча балха шоллагӀча аргӀанга хьежар
Паччахьалкхен председатела заместитель Балахойнаькъан М. гӀишлошъяра министраца Иленаькъан М. цхьана хьежар, «Даьре никъ» яха парк хьалъяра шоллагӀча даькъага, яхаш, дийцар «Сердало» газетага.
«СалоӀама керда объект хьалъяьй Магасе «Шахьара дика хьалаш» яхача федеральни, иштта «Фусам, шахьара хьалаш» яхача къаман проектех.
Хьалхарча аргӀагӀа цига хургйолча салоӀама парка куц го таро йолаш дола балхаш йистедаьхад. Из ба къаман белгалонех пайда эцаш хьабаь кхуркхолг; цига денала, низа гӀирс санна 15 метр лакха шалта оттаяьй», - аьлар хоамо.
ШоллагӀча даькъа чуйоагӀа инвестице оагӀув: хьалъяьй мах бара, кхачан, спорта, салоӀама моттигаш, пхьарашта лаьрхӀа кулгаговзала галерея, цар хьадаь гӀирсаш гойта моттиг.
Шоаш хьожаш, парка доазон мах оттабир, цига къахьегача фирман кулгалхошца къамаьл хилар, хьадаьча балхашта а иштта лакха мах оттабир.
Белгалду, «Даьре никъ» яха парк- из салаӀара йола баьццара моттиг хинна Ӏац, из Магаса культуран вахара лоархӀаме оагӀув ба. Парка цӀи ювзаенна я исторически Даьре наькъаца, цо вӀаший хотташ хиннад Малхбоален, Малхбузен мехкаш. Из никъ керттера а хиннаб культуран бувзамаш, мах бара болх дӀа-юха лелабеча.
