ГӏалгӀайче мах оттабир, ишкола михо даь зе лоархӀаш
ГӏалгӀайчен дешара, Ӏилман министр Цхьорой Ахьмад-Башир, мехка финансай министраца Вешкаранаькъан Тамерланаца цхьана ваха хилар мух хьекхача йохаяьча ишколе. Белгалду, цу тайпара хьал вайцига нийсделар карарча шера аьтинга бетта 12-ча дийнахьа, иштта маьцхали бетта 8-ча дийнахьа. ЧӏоагӀа хьекхача михо дикка зе дир дешара моттига.
«Шоаш хьожаш болча хана, министраша мах оттабир хиннача зен, иштта белгалдир де деза балхаш. Терко тӀаяхийтар кастлуш из дешара моттиг юха меттаоттаяра, берий таро хургйолаш дикача хьалашка деша. Хоадам бола болх дӀабахьа лаьрхӀар бераш деша гӏоргдолаш шоай ханнахьа», - аьлар «Сердало» газетага ГӏалгӀайчен дешара, Ӏилман Министерстве.
Цу ишколе уж бахар иштта дувзаденна дар, мехка дешара моттигашка цу тайпара хӀама нийслургдоацаш, дӀахо а хьажарца, из юхатохара хьалаш вӏашагӏдохкарца.
ГӏалгӀайчен Ӏаьдал цкъа белгалдаь Ӏийнадац, чоалхане этта хьал ший ханнахьа теркалдар лоархӀаме долга, иштта зе хиннача вахарца ювзаеннача моттигашта массе оагӀорахьара новкъостал хила дезилга.
