Котбаьннараш: Чуранаькъан Т. Х. цӀерах йолча Къилбаседа Кавказерча доагорах, энергетиках йолча колледжа кабелга гӀолла ток дӀа-хьа йоржаярах йолча пхьоаллен кулгал деш вола Ховтанаькъан Ахьмада Ювсап, Къилбаседа Кавказерча тайп-тайпарча оагӀонех йолча колледжа ЧПОУ унахцӀенонца дувзаденнарех болча оагӀон хьалха латташ йола Салатов Мурада Макка, Ӏарпенаькъан Ювсапа цӀи лелаеча политехнически колледжа «Плитка тохар» яхача пхьоаллен кулгалду Албохчанаькъан Хьажбикара Ювсап.

Курске дӀаяхьа лерхӀача ерригача Россе яхьашка республика дӀахьокхаш хургва хьалхарча моттиге этта Ховтанаькъан Ювсап.

«Шун къахьегам «Укх шерара говзанча» яхача яхьаша хьагойт. Вахара наькъ тӀа кагирхошта эшаргдола хӀамаш хьалхадоахаш, боккха пайда боаржабеш да шо шоай балхаца. Доккха баркал оал аз шух хӀаранена, иштта къахьегарах», - аьлар министра Цхьорой Ахьмад-Башира.

«Укх шерара говзанча» яха ерригача Россе яхьаш РФ дешара гӀулакхех йолча Министерствос юкъеяьхай, юкъерча дешара моттигаш хьаллаца, иштта начӀал, лакха говзал йола хьехархой гучабаха.