ГӏалгӀай мехка белгалбаьлар, Ӏадсаькх кхоссара Кубок къайсача котбаьннараш
Шолжа-Шахьаре, ГӏалгӀай Республикан Ӏадсаькх кхоссарах йолча Кубка чаккхе еш, дикагӀа бола спортсменаш белгалбаьлар, яхаш, хоам бу «Сердало» газетага из болх вӀашагӀбеллараша.
Яхьашка дакъа лоацаш, 30 совгӀа ГӏалгӀайчера Ӏадсаькх кхувсараш бар, иштта цига бар Къилбаседа Хӏирийчен викалаш - Мамикон Гамбарян, Нохчий Республикан - Адаев Аслан, цар шоай профессиональни говзал гойтар, 18 метр гаьнара ӏадсаькх кхоссаш. НачӀал дола спортсменаш тӀаийцар Шолжа-Шахьара №8 йолча юкъерча ишкола спортивни даькъ тӀа. Кхетаче вӀашагӀъеллар яр Ӏадсаькх кхоссара Федераци; дешара моттига кулгалхочо Оздой Хьусена, «Ӏадсаькх 06» тика дас Шоанахой Адама, «СунжаКом» яхача гӀирсаш, электрика йохкача тика дас Бекботанаькъан Джамала хьал а лоацаш.
«Олимпик» яхача даькъ тӀа котваьлар Султиганаькъан Урусхан. Адаев Ислам хилар шоллагӀча моттиге. Гӏайрбиканаькъан Ӏалихана кхоалагӀа моттиг кхаьчар.
«Блочни ӏадсаькха» даькъ тӀа лакхара моттиг яьккхар Боранаькъан Ислама. ШоллагӀча моттиге хилар Гӏайтакханаькъан Аслан. Борза совгӀат кхаьчар Бузуртанаькъан Лом-Ӏаьланна.
«Баребоу» даькъ тӀа дика толамаш гойтарах «дошув» даьккхар Хамхой Мусас. ШоллагӀа, кхоалагӀа моттигаш кхаьчар Султиганаькъан Урусхана, Цӏечой Мухьмада. «Инстинктив» даькъ тӀа хьалхара моттиг яьккхар Баркинхой Мовладина. Налганаькъан Ӏийсайна дото майдилг кхаьчар, Товтанаькъан Адама кхоалагӀа моттиг яьккхар.
«Исторически ӏадсаькх» яхача даькъ тӀа Гӏоандалой Тимур котваьлар, дошо совгӀат доаккхаш. Матенаькъан Сулейма шоллагӀча моттиге хилар. «Лонгбоу» оалача къовсаме котваьлар Гӏуражанаькъан Абусалам.
«Кубок дӀайихьар лакхача боарам тӀа. Берригача спортсменаша дика толамаш гойтар. Къаьстта гӀадвигар вай дӀаболалуча ӏаддалхоша. Масала, Вахарнаькъан Мухьмад Ӏадсаькх кхосса Ӏомалуш вола цхьа ах шу ха мара яц, цо дика толамаш гойтар», - аьлар ГӏалгӀай Республикан Ӏадсаькх кхоссара Федераце вице-президента Йовлой Мухьмада.
