Молхаш йийтта ялат даарах, оалхазараш дайнад, яха хоам, бух боацаш болга хьакхайкадир республике
Шолжа-Шахьарерча Белоголинка оалача кхале молхаш йийтта ялат даарах, оалхазараш дайнад, яха къамаьл тахка арабаьннача болхлоша гучадаьккхар, из хоам бух боацаш болга. «Сердалога» из дийцар мехка кабмино.
«Оахамаш тӀа болх дӀабахьа арабаьннараша зийнад дайна дада оалхазараш: акха котамаш, аьрзеш, иштта кхыдараш а. Оалхазараш довр бахьан дӀа-хьа тийса молхаш йийтта хӀажкӀа, кем, мукх баар да, йоахар хоам тӀа. Вай мехкарча Ӏалама гӀулакхех йолча министерствон болхлой, чехка арабаьлар из гӀулакх тахка. Массадолчунга хьежача, гучадаьлар из къамаьл бакъдоацилга, дер дайна лелараша арадаьккха долга.
Ахархошца къамаьл дир цар, оахамаш тӀара балхаш дӀакхухьача хана, цига лела оалхазараш теркалдеш, деррига гӀулакх боаггӀача боараме дӀахьош хила, аьнна.
Мехкара Ӏалам, Ӏаламца дувзаденнараш лорадар вай массане цхьа доккха декхар да!
