ГӏалгӀай мехка хьаяьй, «Коталон таьрахьий лувкхера» яха республикан фестиваль
МагӀалбика шахьара №5 йолча юкъерча ишкола даькъ тӀа дӀадихьар «Коталон таьрахьий лувкхера» яха республикан цӀай-кхетаче, из хетадаь дар советски эскаро немций бӀу бохабаь 80 шу дизара, яхаш, дийцар «Сердало» газетага дешара моттиге.
«Тӏема сийлен шахьара цхьан майдан тӀа гулбелар инноваце говзанчаш, уж бар вай мехка дешара моттигашка багӀараш. Яхье оттаяь номераш яр «VR Музей», «Нейросеть, вай даьйх бола дагалоаттам мишта дийнбергба», иштта «Коталонах дола гойтама кинош». Нийсхо йолаш хургдолаш, хӀара даькъ тӀа белгалбора котбаьннараш.
Дешархоша боккхача безамца дӀабихьар из болх, цар гойтар проекташ, Россе истори хьакхоллар VR новкъосталца, нейросеташца», - аьлар хоамо.
«Дагалоаттама толам» яхача даькъ тӀа котбаьннарашта совгӀаташ а грамоташ а елар.
Яхьаш дӀаяхьаро хьагойт, вай мохк лорабеш, моастагӀчоа духьаллаьттарий сий деш хилар. Из болх вӀашагӀбеллараша яхачох, цу тайпара яхьаш дӀаяхьаро, хиннар а хургдар а кердача технологешка гӀолла вӀашагӀдолла Ӏомабу.
