Удаш Барта ГӀалан бухьебаьлар Магасе
Магас-Шахьара культуран, спорта, туризма Центро ГӏалгӀай паччахьалкхен университетаца цхьана вӀашагӀделлар, дунен тӀа эггара йоккхагӀа йолча мехка этнографе музейга - Барта ГӀалан бухье кхаччалца удаш тӀабалар, яхаш, дийцар «Сердало» газетага доал деча цу моттигера.
«Из Даьхенцара безам гойташ бола болам хетабаь бар маьтсела бетта 9-ча денна. Из иштта бар российски бӀухой денала белгалонна хетабаь болам. Республикан керттерча вузера 30 студент, цу юкъе Индера студенташ а болаш, ловш хилар цу лоархӀамеча гӀулакха юкъе дакъа лаца. Сийлахь-боккхача Даьймехка тӀем тӀа моастагӀчоа духьалъэтта, шоай синош Ӏодаьхкарий сийна деш дар из», - аьлар тхоца къамаьл даьчо.
Барт хилара белгалонна, кагирхоша российски а гӀалгӀай а байракхаш ӀоегӀар Барта Гӏалан тӀа.
