ТӀема мугӀарашка лаьттача ветераний сий ду
ГӀалгӀайче сий ду тӀема мугӀарашка лаьттача бӀухой. Россе, кӀимарса бетта 1-ча дийнахьа, лаьрххӀа а доацаш, бакъда лоархӀаме а долаш цӀай да - тӀема мугӀарашка лаьттача бӀухой Ди, яхаш дийцар «Сердало» газетага республикан миннаце.
«2022 шера тушола бетта денз, цу юкъе боагӀа лаьрххӀача операце бӀухой а.
Таханарча денга кхоачаш ГӀалгӀайче 28 эзар совгӀа ветеранаш бах, цу юкъе Сийлахь - боккхача тӀема цхьа ветеран, 10 эзар совгӀа Россе, кхыча паччахьалкхений доазонаш тӀа дакъа лаьцараш, 200 совгӀа бӀухой - афганцаш», - йоах хоамо.
Уж ба денал дола, моллагӀча хана шоай Даьхен оагӀув лаьца, майрал гойташ духьалъоттаргбола нах. Царгара массайолча хана масал эц, уж ба тӀема сий а низ а. Царна карагӀдаьннар белгалдаьд паччахьалкхен совгӀаташца.
Цар дӀахохьу дикагӀа дола российски тӀема Ӏадаташ, кхувш йоагӀача тӀехьенна дика масал гойт. Цар мугӀарашка ба цаӀ йолча, йохаргйоацача Россе дукхача халкъий викалаш.
