Берий дарбанчен доазонашка, керда инфекционни моттиг хьаелларгья
Ер бутт чакхбоалача хана, лоархӀаме гӀулакх да мехкарча унахцӀенон оагӀон моттиге де лаьрхӀа – хьаделларгда Берий клинически дарбанчен керда инфекционни дáкъа. 60 сага моттигаш луш йолча цун гӀулакх карарча хана кийча да ала йиш йолаш да, зӀамига унахой тӀаэца. Дарбанченна эшаш дола гӀирсаш дӀаоттадеш боахк тахан. Дарба дар боаггӀача боараме хургдолаш, къахьегаш ба цига.
«Цу моттиге эггара керттердар, къаьсттача цхьан сага йола палаташ хилар. ХӀара палате лувча, кулг-юхь дила моттиг я, иштта фо лоаттадеш бола гӀирс, лорий йиша хьаехаш бола гургал, кхыдараш да. Кхывола саг чуваха йиш йоаца палаташ кӀалхарча гӀата тӀа я. Из чӀоагӀа лоархӀаме да дӀа-хьа доалаш дола лазараш ца даржийтара тӀехьа. Геттара лира лоархӀаш доаца лазараш дараш лакхерча гӀата тӀа хургба. Шоай лаборатори, операцеш еш йола чухье, реанимаци я цига, ялх маьнги латташ. Инфекционни моттигера аравала ца везаш, дӀадахьа вӀаштӀехьадаргда деррига дарба, операци яр а, кхыдар а», - белгалдир вай Мехкадас Келаматанаькъан Махьмуд-Ӏаьлас.
2021-ча шера дӀаболабир из лоархӀаме болх. Деррига а цу гӀулакхо дӀалаьцар 719 миллион совгӀа ахча да. Из моттиг хьаелла аьнна чӀоагӀо йир республике COVӀD-19 даржарах, унахцӀенон оагӀон хьалха дукха халонаш эттача хана.
Геттара чӀоагӀа даржаш долча лазарашта духьала массахана кийча хила везилга хьагойтар цу хана эттача къемато.
Иштта йола, таханарча хано дӀадеххача тайпара хьаяь моттиг республике хьаеллар вайна массанена лоархӀаме да.
