Суртанчас ший къаьстта гойтам хьабийллар
31.10.2023 12:12
ГӀалгӀай Республикан исбахьален искусства Паччахьалкхен музее «Моттигаш ювзаш» яхача мехкий зӀамигача болама чубоагӀаш, Россе суртанчас Хоронько Игора къаьстта ший цхьанне гойтам хьабийллар, яхаш, дийцар «Сердало» газетага культуран урхаллене.
Беза хьаьший хинна, цига баьхкабар ГӀалгӀай Республикан культуран министра гӀонча Куртой Макка, СКФО гӀолла йолча Росреестра урхаллен кулгалхо Песков Вячеслав, ГӀалгӀай Республике гӀолла йолча Росреестра кулгалхо Борисов Андрей, ГӀалгӀай Республикан «Роскадастра» наьха бокъоний компане филиала кулгалхо Доданаькъан Рукъет, ГӀалгӀайчен искусствай цӀихеза болхло Мейренаькъан Ӏалихан.
Гулбеннарашта байзар 50 совгӀа болх. Кхетаче йистейоалаш, ГӀалгӀай Республикан суртанчий музея кулгалхочо ТӀумхой Любас, баркал оалаш, суртанчанна грамота елар, цо культура дегӀайоалаяр, музея доалахьдар совдаккхар бахьан долаш», - аьлар музея болхлоша.
Белгалдаккха деза, гойтам дӀаболабаьб Ставрополера. Из болх вӀашагӀбеллараша лаьрхӀад Къилбаседа Кавказа тайп-тайпарча моттигашка из дӀабахьа, суртанчас хӀара музейна ший цхьацца сурт совгӀата дутаргда.
Йоккха акци дӀахьоргья Луганск-Шахьаре. Россе кердача моттигашта, тӀема хана музейшта хинна зе меттаоттаде ловш, 25 картина лургда.
