ЦӀихезача авиаторех-мехкахоех лаьца гойтам дӀабихьар мехка
11.08.2025 13:57
«Россе авиаце исторецара гӀалгӀай» яха видеогойтам дӀабихьар мехкахбаьхача наьха Мемориальни комплексе. Къаман цӀихезача, доккхача исторе лар йитача мехкахой цӀераш йовза аьттув хургба цига хьабаьхкарий.
«ХӀара сурт, хӀара каьхат сигаларча балхацара говзал йовзийташ да цига. Цу юкъе ва Къилбаседа Кавказерча къамашта юкъера эггара хьалхара летчик, Таджикистана авиаце пионер Ӏоахарганаькъан ЧхьагӀа Рашид-Бек, тӀема авиатораш, Россе Турпалаш хинна Оздой Ахьмада Мурад, Къоастой Устарха Ширвани, иштта кхыбараш а», - дийцар «Сердалога» гойтам дӀахьош хиннараша.
ХьатӀадоагӀаш дола Россе сигаларча тӀема низа Ди цу оагӀонца говзал, майрал, денал гойташ лаьтта мехкахой вайна дагабохийташ да. Из цӀай РФ президента амарца 2006-ча шера чӀоагӀдир мехка.
