Паччахьа эскара юнкерах Пхьилекъонгий Ювсапах бола гойтам
16.10.2023 16:04
ГӀалгӀайчен къам мехкахдаккхарах болча дагалоаттама Мемориала гойтама зале хьажа йиш я «Пхьилекъонгий Зейтула Юсап- РИА юнкер, Георгиевски жӀарга визза кавалер» яхача гойтамга. Из дӀахьош ба «Лоаман аьрзи» яхача проекта чубоагӀаш, цига дувц гӀалгӀай бӀухой деналах, турпала гӀулакхех.
«Россе паччахьа эскара юнкер Пхьилекъонгий Ювсап ваьв 1898-ча шера Терски областа Наьсарен кхале. Из деша ваьгӀав Наьсарерча лоамарой ишколе, хӀаьта тӀема гӀулакх цо дӀадоладаьд хьалхарча Волжски гӀазкхий полке, 4-ча сотне зӀамагӀа вола урядник волаш. Пхьилекъонгий Ювсап Хьалхарча дунен тӀем тӀа хиннав. 1917 шера аьтинга бетта тӀем тӀа белгалваларах, полка кулгалхоша юнкер ваь хиннав цох.
Атта доаца вахар хиннад цун дӀахо, цунах дувц тха гойтамо», - аьлар «Сердало» газетага из моттиг кийчъяьраша.
Хьамсарча мехка истори довза безам болча кагирхой таро я «Пушкина картах» цунга хьажа.
