Россе хьалхарча турпала Осканаькъан Сулумбика хетабаь гойтам хьабийллар мехка
Мехкахбаьхача наьха Мемориальни комплексе дӏабихьар, Россе Турпала Осканаькъан Сулумбика вахара никъ хаьда 34 шу дизара хетабаь гойтам. Авиаце исторе цӏаккха а дӏайовргйоацаш я вай мехкахочун боча цӏи.
«Россе турпала вахара никъ, къона волча хана денз, цун карагӏдаьннарех, цун хиннача уйлаех дувцаш кхетаче яр из. Дагадоацаш хинна хатар бахьан долаш, вахарах хаьдача Суламбиках дувца дукха да тахан. Гойтаме дар цун сурташ, из тӏавола видеош, цо лелаяь хӏамаш», - дийцар «Сердалога» мехкарча МКЖР. Российски Федераце исторе хьалхара турпал ва вай мехкахо. Авиаце генерал-майор, СССР цӏихеза лётчик волаш лаьттар из.
Ший декхараш дизза кхоачашдеш, къаман сий доаккхаш лаьтта саг вар из! 1992-ча шерарча саькура бетта 7-ча дийнахьа хаьдар цун вахара никъ. МиГ-29 фецарча кемаца айвенна волаш, дагадоаца хатар хинна лохдала доладелар цун кема. Кӏалха нах бахаш юрт яр, шийна ма могга нах боацача дӏаверза гӏертар из. Липецки областа Добрински кхален Хворостянка яхача юрта ӏодожийтанзар цо кема, ший са кӏалха оттадаь.
Из турпалал дицденна ха йоагӏаргьяц авиаце исторе! 1992-ча шера бекарга бетта Россе Президента амарца Российски Федераце Турпал яха цӏи елар деналах визза хиннача вай мехкахочунна.
