Йоккха Котало яккхара кхалнаха юкъедихьа дакъа дувцаш бола гойтам хьабийллар вайцига
Гитлеровски Германегара котало яккхара юкъе доккха дакъа лаьцача советски кхалнаха хетабаь гойтам хьабийллар, Малсаганаькъан Тухана цӀерах йолча Наьсарерча музее. МоастагӀа вохавеш лаьттарашта гӀо деш хинна вай майра, деналах бизза хинна кхалнах бовзийт цо.
«Гойтамерча каьхаташа, сурташа вайна дувц моастагӀчун наькъаш тедаш лийнна партизанкаш, бӀухошта цӀагӀара гӀо деш хиннараш. Хьабаьхкарашта гургда бӀухой кӀалхарбоахаш хиннача лорий; герз, кхыбола кхоачам хьабеш къахьегаш баьхкарий; кхаш тӀа болх беш бӀарччача эскарашта кхача лоаттабаьрий сурташ. Даьхенах дог лаза кхалнах хинна; халонга, кхерамга боха ца байташ, Коталон ди гаргадоаладеш лаьтта сийдола кхалнах ба уж. Вай массане декхар да цар цӀераш дегашка лоаттаяр, цар лайнар диццадар», - дийцар «Сердало» газетага музея кулгал деча Саганаькъан Мухьмада.
ТӀема ханашка маӀача наха когаметта дӀаайтта, хала балхаш деш чакхбаьннаб кхалнах. 90 совгӀа йола кхалсаг Советски Союза турпалаш, Россе турпалаш хиннай.
