«Турпалхочун парта» хьайийллар эпсара Дзараханаькъан Мухьмада сийна
Къилбаседа Кавказа Чуранаькъан Т.Х цӀерагӀча доагама-энергетически колледже хьайийллар «Турпалхочун парта», лаьрххӀа йола операци дӀахьош веннача ишкола дешархочун Дзараханаькъан Мухьмада сийна. Цига дакъа лаьцар «ЦаӀ йолча Россе» парте моттигерча даькъа секретара, республикан Халкъа Гуллама кулгалхочо Тӏумхой Мухьмада.
Дзараханаькъан Вахий Мухьмад вай дегашка вусаргва даим, цун майрал, денал, духьалъотталуш хилар дага лоаттадергда. Вайна цӀаккха а бицлургбац вай бӀухой-турпалхой»,-аьлар Тӏумхой Мухьмада, дагалоаттама кхетаче хьаеллаш.
Дазараханаькъан Мухьмад ваьв 1994 шера ардара бетта МагӀалбике. Из дика зӀамига саг белгалвоалаш вар бехктокхаме хиларца, дика вахара оагӀув лелабеш саг хиларца. 2011 шера из дӏакхийтар ГӏалгӀайчен тохкамаш деча боламах, дика дакъа лоацаш вар тайп-тайпарча патриотически, волонтерий моттигашка. Колледж яьккхачул тӀехьагӀа из деша эттар Рязански лакхарча фецарча десанта командни училище. Тӏема дешар хала дацар, гӀалгӀай зӀамигача сага. Из иштта хилар Москверча Цӏеча майдан тӀа Коталон Парад дӀахьоча.
2022 шера ардара беттагара 2025 шера саькура беттага кхаччалца, эпсара турпалал гойтар; СВО даькъ тӀа Нестерянка, Мирное, Гуляй Поле, Малые Щербаки, Васильевка яха юрташ йоахаш. 2024 шера маьтсела бетта цун парадни гӀирс хозбир Денала ордено.
Дзараханаькъан Мухьмада ший турпала валар тӀаийцар 2025 шера саькура бетта 15-ча дийнахьа, Запорожски оагӀон Каменское юрта йистте, дизза кхоачашдаь ший тӀема декхар.
