Культураца дувзаденнарех йола Президентски ганза фусам хьайийллар вай мехка
Къилбаседа Кавказа доазон тӀа шоллагӀа йола, культуран оагӀонцара Президентски ганза фусам хьайийллар вай мехка. Россера 27-гӀа я из. Цо хьагойт моттигера культуран оагӀонцарча проектий гӀулакх дикка даржаш латтилга. «Са бизнес» яхача Наьсарерча моттиге дӀайихьача цу кхетаче дакъа лоацаш бар культуран оагӀонцара лоархӀаме болхлой, хьаьший. Царна юкъе бар культуран гӀулакхех йолча Президентски ганза кулгал деш вола Карманов Роман, мехкарча Паччахьалкхенна хьалха латта Сластенин Владимир.
«Кхоллама оагӀонца къахьегаш барашта, проекташ йоаржаеча гӀо деш хургья керда фусам. Цу оагӀонцара шоай кхетам лакхбе, цхьацца хӀама Ӏомаде аьттув хургба цига НКО болхлой, бизнесмений, мехкарча тайп-тайпарча моттигий доакъашхой. Республикера культураца дувзаденнараш тоадара тӀехьа боккха аьттув ба из. ГӀалгӀай мехкарча Паччахьалкхени Президентски ганзаи юкъера бувзам чӀоагӀбеш дола гӀулакх аьтинга бетта дӀайихьача Петербургски къамашта юкъерча экономически кхетаче чакхдаьккхар», - дийцар «Сердалога» мехкарча Паччахьалкхене.
Мехка тахан хьадаьннараш доаржадеш болх дӀабахьара тӀехьа лоархӀаме моттиг дӀалоацаш да мехка ПФКИ фусам хьаеллар. Культуран, кхоллама вахаре лаьрхӀараш кхоачашдара тӀехьа гранташ тергья ганзо. Федеральни оагӀонца хьаллоацаргья хӀанз мехкара проекташ.
Гранташ эцаш чудала дезача дехара болх а аттача баьккхаб царна. Мехкарча начӀал дарашта хьалхашка керда, доккхий наькъаш хьадийллар тахан, хӀаьта из геттара лоархӀаме да цхьацца хӀама чакхдаккха ловрашта.
