СКФО кӀезига нийслуча, халача лазарашта дарба деш йола моттиг хьайийллар вай мехка
Наьсарерча берий поликлинике хьайийллар гучадаха, дарба де хала долча лазарашта дарба деш йола моттиг. Ишттача лазараша лаьцача вай берашта боккха аьттув луш хургья из моттиг.
Премьер-министр Сластенин Владимир, унахцӀенон гӀулакхех йолча министерствон хьалхалатта Ӏалбаканаькъан Зара, «Дикача наьха оагӀув» яхача ганза кулгалду Ткаченко Александр, иштта кхыбола хьакимаш гулбеннабар дарбанче хьаеллача.
Дийнахьа Ӏобийша дарба де йиш йола палаташ, иштта кхыдола мел эшар чудолаш хургья СКФО эггара хьалхара из моттиг. Хала лоархӀаш дола лазараш даржаргдоацаш, болх дӀакхухьаргба цига.
«Республикера унахцӀенон хьал меттаоттадар эггара лоархӀамегӀа долча декхарех да тахан. Хала лоархӀаш дола лазараш юххьанца хьакхийттача хана гучадаха, ханнахьа дарба дӀадоладе аьттув луш я керда дарбанче»,- белгалдир вай Мехкадас Келаматанаькъан Махьмуд-Ӏаьлас. Таханарча дийнахьа из тайпара лазараш долаш вай мехка 57 саг ва, царна юкъера 32 бераш да. 29 бера дарба дӀадоладаьд цига, «Дикала оагӀув» яхача ганзо мел эшаш йола молхаш лоаттаю царна.
