Вай котало яьккха 80 шу дизара хетадаь да из гIулакх. Из дIадоладеча дакъа лаца вай мехка кхаьчар Лохерча Новгородера «Курган» яха хIама лохаш йола тоаб. «Сердалога» из хоам бир МагIалбика кхален администрацера.

«Хаоттам шийла бале а, укх бетта 24-ча дийнахьа дIаболабаьб цар шоай болх. Цу юкъе дакъа лоацаш я «МагIалбик» яха тоаба, иштта Iаьдала болхлой. Де доацаш байнача бIухоех хIама корадаьдац карарча хана, бакъда болх тIатеIIа дIахобахьа лаьрхIа ба уж», - йоах хоамо.

Шахьара дас Мухтара Iаддал-Хьамида доккха баркал оал из атта боаца болх дIахьош къахьегарашта, иштта моллагIа эшаш дола гIо де кийча болга хьоахадир.

«Курган» яхача тоабан доакъашхошта лоархIаме грамоташ елар, шоай декхараш иштта лакхача боараме чакхдаха гIерташ хьабахкарах.