Маьтлоама къайленаш гучаювлаш латт мехка
21.08.2024 11:30
Къаман истореца дувзаденна сийленгаш гучадоахаш болх дӀакхухьача ЖӀайрахьа-Ахабоарзен музея болхлоша зийра Маьтлоамах йоахка хьагӀарий хьисапе хьаяь моттигаш. Из хоам «Сердалога» бир мехка кабминера.
«Болх дӀахьош баьхкараша гучаяьхар хьагӀарашта тара йола ялх моттиг. ЛаьрхӀа болх дӀахьош, гонахье тоаеш хьаяьй уж къахьегаш баьхкараша», - йоах хоамо.
ЙиълагӀа йола хьагӀар ворхӀ метр дӀачуаьхка я. Ӏилманхоша яхачох, иштта йола моттигаш Маьтлоама оагӀонашца 30 я. Уж тайпара моттигаш лораярах йолча Паччахьалкхен Комитето тӀахьожам лоаттабеш хургья гучаяьнна, тамашийна йола хьагӀараш.
