Гӏалгӏай мехка хьехархой ца тоъа моттигаш кӏезига я
Аналитикий хоамах, ма хулла нийсагӏа аьлча, Гӏалгӏай мохк Нохчашца, Селий мехкаца нийсбича, юкъебодаш ба хьехархошца кхоачам болаш йолча Россе моттигашта. Из болх иштта латташ хилар да, моттигашка лерттӏа болх дӏахьош хилар. Мехкашта 10 баллах 6-7 кхоач, хьехархошца ӏалашъяь хиларах йолча рейтинге, цо тешал ду дешара даькъ тӏа дикал лакха йола кадрай политика дӏахьош хилара. Белгалду, Гӏалгӏай мехка 35 шерал кӏезигагӏа дола хьехархой 33,6 процент ба, хӏаьта боккхагӏа бола хьехархой дикка лохагӏа ба, Россе юкъарча статистика боарамал.
«Из толам баккха таро хилар мехка ший болх дика вӏашагӏболларах. Тӏеххьарча ялх шера республике хьалъяьй 48 хӏанзарча заман ишкол, цунца цхьана дӏахьош ба хьехархошца ӏалашо яра болх. Тахан Гӏалгӏайчен ишколашка болх беш ва 718 къона говзанча, болх бу ха 0 шергара 3 шерга кхаччалца йолаш, эзар совгӏа хьехархо ва пенсе ваха къахьегаш, цар шоашта ховш дар дӏалу къонача хьехархошта, иштта балха юкъеоз лакхерча дешара курсашка, колледжашка багӏараш. Цул совгӏа, 2025 шера йистедаьккхар хьехархочун дешар 632 сага. Гӏалгӏайчен паччахьалкхен университет яьккхараш ба уж», - аьлар ший телеграм-оагӏон тӏа Гӏалгӏайчен кулгалхочо Келаматанаькъан Махьмуд-Ӏаьлас.
Белгалду, дӏадахача шера хинначунца нийсдича, карарча шера керда дешара шу дӏадоладелча денз, 6067-гара 7101 сагага кхоачаш хьехархой хилар. Хӏанз укх сахьате 84 моттиг кхы а я хьехархой балха хьаэца йиш йолаш, уж моттигаш хьалъюзаш къахьегаш да ӏаьдал. Цо хьагойт Гӏалгӏайче нийсача наькъ тӏа йолга. Цо ший аргӏагӏа таро лу дешара хьал тоаде, дӏахо мохк дикагӏа дегӏабоалабе. Из кӏийле хиларо, республикан дешар а лакхагӏча лагӏа тӏа оттаде таро хургья.
