2022 шера денз, из белгалду хӀара шера маьтсела бетта кхоалагӀча шоатта денна. Цу дено белгалду, вай къаман дӀаяхача заман чухь нах баьха гӀалаш еза хилар.

«Тахан, вай хьалкхийнача тӀехьено доаккхал ду шоай даьй баьхача гӀалаех, цар шоашта могар ду уж цӀена, хоза йолаш, шоаш хиннача тайпара меттаоттаяра. Вай декхар да, из мах баь варгвоаца ганз царга кхачийтар. Вай даьша дукха халонаш эзай уж хьалъеш, хӀаьта уж лорае езараш вай да тахан!» - аьлар «Сердало» газетага ЖӀайрахьа-Эса-ЧӀожерча паччахьалкхен историко-архитектурни, Ӏалама музее-заповеднике къахьегараша.

ГӀалгӀай культуран, исторе архитектуран тамашийнача гӀишлошта чуйоагӀа вай даьша дӀаяхача замашка хьалъетта тайп-тайпара гӀалаш, цу юкъе малхара кашамаш а долаш, царна йоккха терко лоаттаю Ӏилманхоша, тохкамхоша, иштта цецбоах цар ГӀалгӀайчен хьаьший.